पनवेल कल्चरल सेंटर तर्फे सुगम संगीत स्पर्धा जागतिक संगीत दिवसानिमित्त (दि.21 जून) पनवेल कल्चरल सेंटरने 8 ते 15 वर्षे वयोगटातील मुला-मुलींसाठी सुगम संगीत स्पर्धेचे आयोजन केले असून यात स्पर्धकांना भावगीते/भक्तीगीते सादर करता येतील. यासाठी स्पर्धकानी त्यांच्या आवडीची 3 गाणी आणि त्यांचे स्वर लिहून पाठवायचे आहेत. त्यांनी कोणतं गाणं गायचंय हे स्पर्धेच्या आधी सांगण्यात येईल. या स्पर्धेच्या प्रथम क्रमांक विजेत्यास रु.3,000 चे रोख पारितोषिक व सन्मानचिन्ह देण्यात येईल, द्वितीय क्रमांक विजेत्यास रु.2,500 चे रोख पारितोषिक व सन्मानचिन्ह देण्यात येईल. तर तृतीय क्रमांक विजेत्यास रु. 2,000 चे रोख पारितोषिक व सन्मानचिन्ह देण्यात येईल. प्रत्येक सहभागी स्पर्धकाला प्रमाणपत्र दिले जाईल. नाव नोंदणीची शेवटची तारीख : 12 जून 2026 असून स्पर्धेची तारीख 21 जून 2026 आहे. अधिक माहिती आणि नाव नोंदणीसाठी संपर्क : संध्या घाडगे 98192 21125, 86550 50492.

पनवेल कल्चरल सेंटरच्या संगीत नृत्य आणि कला विद्यालयाच्या विस्तारित कक्षाचे उद्घाटन

समाजासाठी चांगलं काही करणार्‍या व्यक्ती वा समाज यांच्या पाठीशी समाज आजही उभा राहतो हे नुकतंच पुन्हा एकवार सिद्ध झालं. निमित्त झालं ते पनवेल कल्चरल सेंटर संचालित पं. विष्णू दिगंबर पलुस्कर संगीत नृत्य आणि कला विद्यालयाच्या पहिल्या मजल्यावरील विस्तारित कक्षाच्या उद्घाटनाचे. हे उद्घाटन नुकतेच सुप्रसिद्ध उद्योजक आणि संस्थेचे हितचिंतक विलास कोठारी यांच्या हस्ते पार पडले. याप्रसंगी गानगुरु पं. मेघनाथ कोल्हापुरे आणि पं. बाबादास तुपे आवर्जून उपस्थित होते. आजकाल पनवेल-नव्या मुंबईतील जागांना आलेले महत्व, जागांची कमतरता व त्यामुळे जागांच्या भरमसाठी किंमती, जगांवरुन होणारे कलह, कोर्ट-कचेर्‍या या सगळ्या पार्श्‍वभूमीवर बांधकाम व्यावसायिक विलास कोठारी यांनी व्ही. के. हायस्कूलजवळच्या आशीर्वाद इमाारतीतील स्वत:ची जवळजवळ एक हजार चौरस फुटाची जागा पनवेल कल्चरल सेंटरच्या संगीत विद्यालयास कोणताही मोबदला न घेता वापरायला दिली याबद्दल त्यांचे शहरात कौतुक होत आहे. तळोजा येथील व्हिस्टा प्रोसेस्ड फूडस् प्रा. लि. या कंपनीने त्यांच्या सीएसआर फंडातून दिलेल्या देणगीतून या जागेचे नूतनीकरण-सुशोभिकरण करण्यात आले. उद्घाटनानंतर विद्यालयातील नियोजित भरतनाट्यम शिक्षिका सई जोशी यांचे भरतनाट्यम सादरीकरण तसेच सतार शिक्षिका पल्लवी कुमार यांचे सतार वादन झाले. त्यांना तबला साथ राहुल पेठे यांनी केली. यानंतर नियोजित बासरी शिक्षक प्रसन्न जोशी यांचे बासरी वादन झाले. त्यांना संस्थेच्या विद्यालयातील तबला शिक्षक संतोष मसणे आणि पं. किशोर पांडे यांनी तबला साथ केली. कार्यक्रमाचे सूत्रसंचालन मोहन हिंदुपूर यांनी केले. याप्रसंगी संस्थेने केलेल्या आवाहनास प्रतिसाद म्हणून अनेक मान्यवर सभासदांनी संस्थेला विविध वाद्यांची देणगी दिली आहे. आपल्या या विद्यालयात शास्त्रीय संगीत, सुगम संगीत, हार्मोनियम, तबला, कथक, चित्रकला इ. याआधी सुरू असलेल्या विषयांबरोबरच आता यावर्षीपासून सतार, गिटार, बासरी, कीबोर्ड (सिंथेसायझर), व्हायोलिन आणि भरतनाट्यमचे वर्गही सुरू होत असून त्यांची प्रवेश प्रक्रिया एक जूनपासून सुरू झाली आहे. विद्यालयातील प्रवेशांसाठी संपर्क - मधुरा सोहनी - प्राचार्य. Mob. 99207 18745